„უნივერსიტეტის ავტონომიურობის საბურველს ამოფარებით, უნივერსიტეტში მონური საზოგადოება ყალიბდება“
საზოგადოება

„უნივერსიტეტის ავტონომიურობის საბურველს ამოფარებით, უნივერსიტეტში მონური საზოგადოება ყალიბდება“

„უნივერსიტეტის ავტონომიურობის საბურველს ამოფარებით, უნივერსიტეტში მონური საზოგადოება ყალიბდება“
მანანა ნოზაძე

2018-10-05 12:44:32

თსუ-ის ეკონომიკისა და ბიზნესის ფაკულტეტზე ჩატარებული კონკურსით თამაშგარე მდგომარეობაში აღმოჩნდა თსუ-ის ეკონომიკისა და ბიზნესის ფაკულტეტის ასოცირებული პროფესორი ნინო პაპაჩაშვილი. მისი აზრით, აღნიშნულ ფაკულტეტზე პროცესებს მართავს შევარდნაძისდროინდელი კადრი - ავთანდილ სილაგაძე. ამიტომაც კომისიის წევრების ყურადღების მიღმა აღმოჩნდა ნინო პაპაჩაშვილის მიერ თსუ-ში საერთაშორისო ეკონომიკის მიმართულებით გაწეული სამუშაო.

For.ge ნინო პაპაჩაშვილს ესაუბრა.

სხვა კონკურსანტთა მსგავსად, კონკურსის შედეგით თქვენც უკმაყოფილო ხართ. რაში გამოიხატება კომისიის წევრთა ტენდენციურობა თქვენს მიმართ?

- მიმდინარე წლის ზაფხულში ივანე ჯავახიშვილის სახელობის თბილისის სახელმწიფო უნვერსიტეტის ეკონომიკისა და ბიზნესის ფაკულტეტზე ასოცირებული პროფესორის თანამდებობის დასაკავებლად გამართულ კონკურსში ვიღებდი მონაწილეობას და 7 ხმიდან ნული ხმა მივიღე. გამოვითხოვე კონკურსანტების დოკუმენტაცია, კომისიის ოქმები და შემდეგ უკვე სააპელაციო კომისიის სხდომის ოქმები, მაგრამ ვერც ერთი დოკუმენტი ვერ მივიღე.

ეს ინფორმაცია ხომ საჯაროა?

- დიახ, ეს ინფორმაცია საჯაროა, მაგრამ უნივერსიტეტის ყველა ინსტანცია მოვიარე და პასუხი ვერ მივიღე. სააპელაციო კომისიისგან მხოლოდ ერთი ფურცელი მივიღე, სადაც არასწორად არის დებულება მითითებული, თითქოს მე არ მეკუთვნის ამ დოკუმენტაციის მიღება. ასე რომ, კონკურსანტების დოკუმენტაციაში ჩახედვის უფლება არ მომცეს. ეს მაშინ, როცა ძალზე ბევრი აქტივობა გამაჩნია, რადგან 23 წელია, ივანე ჯავახიშვილის სახელობის უნივერსიტეტში ვასწავლი, აქ მქონდა კარიერული ზრდა, მასწავლებლიდან ასოცირებული პროფესორის ჩათვლით. ყოველ შემთხვევაში, ზაფხულამდე ასოცირებული პროფესორის თანამდებობა მეკავა, ხოლო სტუდენტობის წლებსაც თუ მივუმატებთ, გამოდის, უკვე 30 წელია, რაც უნივერსიტეტში ვარ. კონკურსის შედეგით ვარ აღშფოთებულიც, გაკვირვებულიც, გაოგნებულიც, რადგან ამდენი წლის განმავლობაში დასტურდებოდა ჩემი პედაგოგიური მუშაობის მიზანშეწონილობაც და სამეცნიერო მიმართულებით გაწეული მუშაობაც და ახლა ამის საწინააღმდეგო შედეგი დადგა. ძირითადად საერთაშორისო ეკონომიკის მიმართულებით ვმუშაობ და ამ კუთხით გაწეული მაქვს დიდი სამუშაო. დღეისთვის ეკონომიკისა და ბიზნესის ფაკულტეტზე არის 8 სილაბუსი ჩემი ავტორობით, მათ შორის, საბაკალავრო და სამაგისტრო პროგრამებში და ამ პროგრამებმა აკრედიტაცია გაიარა.

სამეცნიერო კუთხით რა მიღწევები გაქვთ?

- ამ მხრივ ჩვენ ყოველწლიურ ანგარიშს ვადგენთ, რაც მეცნიერებათა აკადემიაში იგზავნება და, ალბათ, დადებითად ფასდება, რადგან არავითარი უკუკავშირი არ გვაქვს. ორი მიმართულებით მინდა საკითხი განვიხილო, ერთია, სისტემური ცვლილებების აუცილებლობა, რადგან არ ვარგა ეს საკონკურსო წესი, დოკუმენტაცია რჩება ცალკე და კომისიის წევრთა მიერ მიღებული გადაწყვეტილება, რაც გამოიხატება ხმის მიცემით, აბსოლუტურად ცალკე რჩება და ტენდენციურ, სუბიექტურ ნიშნებს ატარებს.

რა იყო ტენდენციურობის საფუძველი? თავიდანვე იგრძნობოდა, რომ თქვენს მიმართ ნეგატიურად იყვნენ განწყობილნი კომისიის წევრები?

- მე არ ვიცი, რა კითხვები დაუსვეს ჩემს კონკურენტებს, მაგრამ კომისიის ერთ-ერთი წევრის მხრიდან ჩემი მისამართით იგრძნობოდა ტენდენციურად ჩაძიებული დამოკიდებულება გასაუბრების დროს. გასაუბრების ჩანაწერებსაც, ალბათ, სასამართლო გამოითხოვს, რადგან მე ეს საქმე სასამართლოში შევიტანე, თუმცა რამდენად თანაბარი კითხვები იყო ჩემი კონკურენტების მიმართ დასმული კომისიის მიერ, ამის შესახებ არ მაქვს ინფორმაცია. ჩვენთან სულ ორი ადგილი იყო. კონკრეტულად მე საერთაშორისო ეკონომიკის მიმართულებით ვიღებდი მონაწილეობას. ვიყავი საშტატო პროფესორი ერთ ჩემს კოლეგასთან ერთად. სულ სამი კონკურსანტი იყო და მათ შორის მესამე, რომელსაც შტატი არ ეკავა და, რომელსაც მუდმივად იწვევდა კათედრის გამგე, აკადემიკოსი ავთანდილ სილაგაძე. რატომ მაქვს ეჭვები? რადგან იმ მესამეს ავთანდილ სილაგაძე მიზანმიმართულად უქმნიდა საერთაშორისო ეკონომიკის მიმართულებით ავტობიოგრაფიას. არადა, საერთაშორისო ეკონომიკა თეორიაა, მარტივი წასაკითხი არ არის. აკადემიკოს სილაგაძის გუნდის წევრები მუდმივად შემოდიოდნენ ჩემთან სემინარებზე, უზარმაზარი ტესტების ბაზა შევქმენი მე ჩემს ერთ კოლეგასთან ერთად, მომზადებული გვაქვს შუალედური, ფინალური გამოცდისთვის ტესტები, საკითხები, ეს ტვირთი ყოველთვის ჩემზე გადადიოდა და, იცით, რა ხდებოდა? „მომეცი, შაბლონი, მომეცი შაბლონი“, ყოველთვის ასეთი დაძალება იყო მათი მხრიდან. იმისთვის, რომ კოლეგებთან ნორმალური ურთიერთობა შემენარჩუნებინა, ვაძლევდი ამ შაბლონებს. ერთხელაც, შაბლონი რომ ვერ მივეცი, ვეშაპიძემ (რომელიც ახლა გაიყვანა სილაგაძემ ამ კონკურსში), რა გააკეთა, იცით? მოიპარა ჩემი გასწორებული შაბლონი, რადგან ამოცანების ამოხსნის შესაძლებლობა მას არ გააჩნია. ასეთი უუნარო ადამიანები მოჰყავთ, სამაგიეროდ, მონურ მორჩილებას მოითხოვენ მათგან და ისინიც კარგი შემსრულებლები არიან. ასეთი ხალხის შემოკრება აწყობთ.

მანამდე კათედრის გამგის ავთანდილ სილაგაძის მხრიდან არაერთხელ განხორციელებულა არაეთიკური ქმედებები და ეს უნივერსიტეტის ეთიკის კომისიამაც განიხილა. ის არის პრივატიზაციის ყოფილი მინისტრი, რომელიც წლების განმავლობაში არ იღებდა კონკურსებში მონაწილეობას. ზუსტად 2009 წელს კათედრა დაგვიხურეს, აქეთ-იქით გადაგვანაწილეს, ათი წელი ფსიქოლოგიურ და პირდაპირ ომში ვიმყოფები, მე პირადად, ჩემს კოლეგებთან ერთად, შევინარჩუნე ეს პროგრამები, ძალიან დიდი ტვირთი მქონდა და ამიტომ გავხდი მოდულის ხელმძღვანელი ბაკალავრიატის და მაგისტრატურის დონეზე. 2009-დან 2014 წლამდე ვატარე ეს ტვირთი, რადგან სხვადასხვა კათედრაზე ვიყავით შეკედლებულნი.

პაპავას დროს ავთანდილ სილაგაძეს შესაძლებლობა მიეცა, შემობრუნებულიყო უნივერსიტეტში. დიდი ხნის განმავლობაში ის იყო სასწავლო პროცესებს მიღმა, ამიტომ ჩამორჩა დროს და დღეისთვის ვთვლი, რომ ის არის დრომოჭმული აზროვნების ადამიანი, რომელიც აფერხებს უნივერსიტეტის განვითარებას, ჩაძირვისკენ მიჰყავს ფაკულტეტი, ახალგაზრდებს უქმნის შემოსვლის ბარიერს უნივერსიტეტში და თავისი დრომოჭმული მენტალიტეტის გამო მსხვერპლად ხდის კოლეგებსაც და თანამშრომლებსაც. მას დაგზავნილი ჰყავს ინფორმაციის მოსაპოვებლად ადამიანები და არაჯანსაღ ვითარებას ქმნის, ინტრიგებით, არაფორმალური გზებით მართავს ფაკულტეტს და შეკრულია დღევანდელ დეკანთან - გიორგი ღაღანიძესთან.

კონკურსში წარუმატებლობის შემდეგ თუ შეხვდით ავთანდილ სილაგაძეს და ჰკითხეთ მიზეზები, რის გამო დაგიწუნათ საკონკურსო კომისიამ?

- მას არ დავლაპარაკებივარ, მე შევხვდი დეკანს, გიორგი ღაღანიძეს, მოვითხოვე, რომ კათედრაზე ვყოფილიყავი დატვირთული. სხვათა შორის, 2013 წელს წამოვიწყე ნობელის პრემიის ლაურეატის წიგნის თარგმანი, 2014 წელს ავთანდილ სილაგაძე ჩაუდგა ამ წიგნს სათავეში და ლამის ჩაძირა მისი თარგმანი. როგორც იქნა, ამ წიგნის ერთი ეგზემპლარი დავაბეჭდინე, რაშიც მხარი დამიჭირა უნივერსიტეტის კანცლერმა, მაგრამ გამოიტანეს წიგნი და კაბინეტში ჩაკეტეს, რათა სილაბუსებში არ გვქონოდა მითითებული. სარედაქციო კომისიაში ბატონმა ავთანდილმა დააწერა გვარი ვეშაპიძე მაშინ, როდესაც საერთოდ არ არსებობდა ვეშაპიძის თარგმანი.

კომისიის წევრთა შესახებ რას იტყვით?

- კრიტიკის დონეს ვერ უძლებს ის დასკვნა, რაც დადო ამ სამარცხვინო კომისიამ, მეცოდება კომისიის ყველა წევრი, რადგან ისინი არიან მსხვერპლნი. ჩემი ეჭვია, თითოეულ ადამიანს დასდევს სილაგაძე და აშანტაჟებს, რადგან ისინი ხვალ და ზეგ კონკურსანტები იქნებიან. ჩვენმა უბრალო კოლეგამ, რომელიც არ არის ლექტორი, აღნიშნა, რომ უსამართლოდ ჩატარდა კონკურესები და ამ ე.წ. აკადემიკოსმა შეუთვალა, გაჩუმდი, თორემ დაკარგავ სამსახურსო.

თქვენ დასაწყისში ახსენეთ, რომ ავთანდილ სილაგაძე ლადო პაპავას დროს დაბრუნდა უნივერსიტეტში, მაგრამ ლადო პაპავა აღარ არის უნივერსიტეტის რექტორი. ვინ ეხმარება თავად სილაგაძეს?

- ისინი მეგობრობდნენ და მას პაპავამ მისცა საშუალება, შემობრუნებულიყო უნივერსიტეტში, მაგრამ სილაგაძეს დიდი წვრთვნა აქვს მიღებული, რადგან შევარდნაძის დროიდან მოდის. საერთოდ, 30 წლის წინ, რაც ფეხი შევდგი უნივერსიტეტში, უნივერსიტეტს ესენი მართავდნენ, ახლაც ისევ მათი მსხვერპლი გავხდი, რადგან ისინი წყვეტენ უნივერსიტეტის ბედს. ვინც შიგნით ეწინააღმდეგება, ყველა უნდა გაიწიროს. ეს ნიშნავს განსხვავებული აზრის მიუღებლობას. რომელ დემოკრატიაზე ვსაუბრობთ? უნივერსიტეტის ავტონომიურობის საბურველს ამოფარებით, რომ თითქოს უნივერსიტეტის, ფაკულტეტების, კათედრის საქმიანობაში ჩარევა არ შეიძლება, ასეთ შედეგს ვიღებთ. მონური საზოგადოება ყალიბდება უნივერსიტეტში.

ჩვენ ყველას გვაქვს ჩვენი ვალი მომავალი თაობის წინაშე, ყველას გვაბარია ქვეყნის ბედი. ამიტომაც შევიტანეთ კოლექტიური განაცხადი განათლების სამინისტროში და ვნახავთ მათ რეაქციას. როცა უნივერსიტეტის შიგნით არსებულ სისტემას განვითარების შესაძლებლობა არ გააჩნია და აზიანებს მომავალ თაობას, განა ამაზე რეაგირება არ მართებს განათლების სამინისტროს, ან პარლამენტის განათლებისა და კულტურის კომიტეტს?

მესმის, რომ ოქმები დაგიმალეს, მაგრამ ისიც ცხადია, რომ კონკურსგარეშედ დარჩენილი ნებისმიერი ადამიანი უკმაყოფილო იქნებოდა. როგორ უნდა ჩატარდეს ისეთი კონკურსი, რომ, ვინც გასაცხრილია, გაიცხრილოს და უკმაყოფილების გრძნობა არ დარჩეს?

- ფუნდამენტური საკითხები უნდა გამოსწორდეს. აღნიშნული საკონკურსო წესი უნდა შეიცვალოს. ეკონომიკისა და ბიზნესის ფაკულტეტზე დღეს არსებული ფონი ტენდენციური გადაწყვეტილებების მიღებას უწყობს ხელს. ცოტა რთული საკითხია, მაგრამ შესაძლოა, კონკურსანტი ქულებით შეფასდეს და გამოირიცხოს სუბიექტური გადაწყვეტილებების მიღება. პირადად მე თსუ-ის ეკონომიკისა და ბიზნესის ფაკულტეტის ასოცირებული პროფესორი გახლდით, ამჟამად თსუ-ში რამდენიმე საათი დამრჩა ინტერდისციპლინური პროგრამის განხრით. უნივერსიტეტის ღირებულებები განსხვავებულია. მხოლოდ უნივერსიტეტის სტუდენტიც რომ იყო და აღარ გააგრძელო მოღვაწეობა უნივერსიტეტში, მთელი ცხოვრება მაინც უნივერსიტეტელად რჩები. მე აქ 30 წელი მაქვს გატარებული. უფრო მეტად გულნატკენი იმიტომ ვარ, რომ არსებობს A და B კონტრაქტი, B კონტრაქტი იძლევა სხვაგან მუშაობის საშუალებას, A კონტრაქტი კი არ იძლევა. A კონტრაქტით აბსოლუტურად მიკედლებული ვიყავი უნივერსიტეტს და ჩამოვცილდი ყველა სხვა უმაღლეს სასწავლებელს, სადაც გამკაცრებული ადმინისტრაციის გამო პერსონალი უკვე დაკომპლექტებულია. სხვათა შორის, არაერთხელ დაგვმუქრებია ავთანდილ სილაგაძე, კანტიც დიდი ფილოსოფოსი იყო, მაგრამ უნივერსიტეტ-უნივერსიტეტ დადიოდა საათების საძებნელადო. მე კანტს არ ვადარებ თავს, მაგრამ მართლაც ასე გამიხდა საქმე. 2014 წლიდან მოყოლებული, რაც კათედრა აღდგა, უამრავი ფსიქოლოგიური პრობლემა გადავიტანე უნივერსიტეტში. სამი თვის განმავლობაში გახარებული ვიყავი, რადგან ოქმები არსებობდა, საკათედრო საქმეებიც იყო, ახალი მოდული შევაქმნევინე და დახმარება გავუწიე მაგისტრატურაში. საბოლოოდ მიხვდა ავთანდილ სილაგაძე, რომ საერთაშორისო ეკონომიკაში კონკურენციას ვერ გამიწევდა, აკადემიკოს სილაგაძეს ცხოვრების განმავლობაში საერთაშორისო ეკონომიკის განხრით ერთი საათიც არ წაუკითხავს, ის არ არის ამის სპეციალისტი. ის არის ეკონომიკურ მოძღვრებათა ისტორიის სპეციალისტი, მაგრამ თავის დროზე, ალბათ, პარტიულმა თანამდებობებმა მისცა საშუალება, გაეხსნა კათედრა ასეთი სახელწოდებით „საერთაშორისო ეკონომიკისა და ეკონომიკურ მოძღვრებათა ისტორიის კათედრა“. ისევ ძველებურად უნდა, შეინარჩუნოს პრივილეგია და ჰგონია, იქ რომ მიდიხარ, ვიღაცის სტუმარი ხარ. საოჯახო და კლანური მიდგომები აქვს, მათ არც ლექციების ჩატარება არ სჭირდებათ, არც სტუდენტების ბედი არ აინტერესებთ. მათ სურთ, ისხდნენ კაბინეტებში და კლანურად, არაფორმალურად მართონ ვითარება. ავთანდილ სილაგაძეს მეუღლეც უნივერსიტეტში ჰყავს და, ცხადია, ჩემნაირებს გამოუშვებს, რადგან თავის შვილსაც მიიყვანს. სხვებს კი არსებობის საშუალებას უსპობს, ვინც მთელი სიცოცხლე გაიღო უნივერსიტეტისთვის. 90-იან წლებში გავხდი სტუდენტი, ლექციები რომ არ ტარდებოდა და გამოსვლები იყო, მართლა საკუთარი სისხლითა და ოფლით გავარკვიე, რა უნდა გამეკეთებინა მეცნიერებაში, ახლა კი 30-წლიანი ახალგაზრდობა წამართვეს.

For.ge შეეცდება, გაარკვიოს, მართავს თუ არა სიტუაციას ფაკულტეტზე ავთანდილ სილაგაძე?!

ნანახი?- 2569

ნიკა12

2018-10-05 15:16:05

სად არის რექტორი?
ეს ხდება დედა უნივერსიტეტში...

arichopra 2

2018-10-05 15:55:18

ახლა ვინ არის რექტორი?

romani

2018-10-05 16:15:57

arichopra 2

Вопрос, конечно, интересный.

ლენკა

2018-10-05 16:18:39

ნიკა12 და arichopra2

რექტორია გიორგი შარვაშიძე, პაპავას გადაყენების შემდეგ, რომ დაჯდა რექტორად.
სად ცალია პრობლემების მოსაგვარებლად?
ვინღა აპიაროს "თსუ-სთვის გაკეთებული სიკეთეები"

vitali12

2018-10-05 16:43:35

რაღა დროს ავთანდილ სილაგაძეა.
კორუფციის სიმბოლო ჩააბარეთ წარსულს.სირცხვილია.
თსუ-ს პროგრესი, სინათლე ჭირდება და არა ბნელით მოცული იაფფასიანი აკდემიკოსები.

universiteti2018

2018-10-05 17:12:23

ავთანდილ სილაგაძე:
ამ პრობლემაზე ჟურნალისტის რამდენიმე შეკითხვას უკვე გავეცი პასუხი და შესაბამისი მასალა ალბათ გამოქვეყნდება;
მხოლოდ დაუსაბუთებელი არგუმენტები ვერ შეცვლის ქალბატონის საკონკურსო შედეგს: 14 ხმიდან - 0 ხმა;
საკონკურსო კომისიის მუშაობის შედეგებს შეაფასებს სასამართლო, რომელსაც (რამდენადაც ცნობილია) უკვე მიმართა ქალბატონმა;
ზოგადად, ქალბატონის კონფლიქტური, უარგუმენტო საუბრის მსგავსი სტილი ახალი არ არის ჩემი კოლეგებისთვისაც.

universiteti2018

2018-10-05 17:37:22

ავთანდილ სილაგაძე:
vitali12-ს გიპასუხებთ თუ ღიად დააფიქსირებთ თქვენს ვინაობას.

vitali12

2018-10-05 18:03:06

universiteti2018

"აკადემიკოს", პრივატიზაციის მინისტრს ავთანდილ სილაგაძეს ფარულობა და სიბნელე უყვარს: ერთს აფიქსირებს, მეორეს აკეთებს.
მისი მეთოდებს ვერ ვუღალატებ, რადგან ღიაობამ და სინათლემ შეიძლება თვალი მოჭრას და მხედველობა დააკარგვინოს, რა ეშველება მერე ჩვენს ეკონომიკურ მეცნიერებას.

universiteti2018

2018-10-05 18:13:17

ავთანდილ სილაგაძე"
vitali12-ს:
ახლა უკვე გასაგებია ვის დაკვეთასაც ასრულებთ!

auditoria17

2018-10-05 18:19:55

წყარო:http://www.for.ge/view.php?for_id=53151&cat=3

ნატალია ხარაძე: „საბჭოთა, ნაცქოცკრიმინალური, ყველა მთავრობას მორგებული ბანდა ისევ მართავს უნივერსიტეტს“

ნატალია ხარაძე: „საბჭოთა, ნაცქოცკრიმინალური, ყველა მთავრობას მორგებული ბანდა ისევ მართავს უნივერსიტეტს“
მარიამ ლოლაშვილი
2018-05-11 13:00:47
„ნაციონალების“ თარეშმა თბილისის სახელმწიფო უნივერსიტეტს თავისი კვალი დააჩნია, თუმცა დღეს პროფესორ-მასწავლებელთა ნაწილი პირად საუბარში არ მალავს, რომ მოლოდინის მიუხედავად, უნივერსიტეტში დიდად არაფერი შეცვლილა - ისევ დამყაყებული ძველი სახეები, ისევ კონფორმიზმი და უნარიან ახალგაზრდა ლექტორებთან ბრძოლა...

ივანე ჯავახიშვილის სახელობის თბილისის სახელმწიფო უნივერსიტეტის ასოცირებული პროფესორი ნატალია ხარაძე For.ge-სთან საუბარში აცხადებს, რომ ისეთი განცდა ეუფლება, თითქოს უნივერსიტეტი ისევ 2012 წლამდე პერიოდშია ჩარჩენილი. ამის მიზეზი კი ისაა, რომ ნატალია ხარაძეს მარტოდმარტო უწევს იმ პრობლემასთან შეჭიდება, რაც „ნაციონალების“ დროსაც არსებობდა, და უშუალოდ უწევს იმ ადამიანებთან დაპირისპირება,რომლებიც უნივერსიტეტში პროგრესს ყოველთვის აფერხებდნენ.

ახალი ხელისუფლების მოსვლის შემდეგ უკვე მერამდენედ შეიცვალა უნივერსიტეტის რექტორატი. ეს ცვლილებები ფასადურია?

- უნივერსიტეტში აბსოლუტურად არაფერი შეცვლილა. ვერც ფასადურ ცვლილებას ვხედავ. უნივერსიტეტის ადმინისტრაციაში აბსოლუტურად იგივე ადამიანები მუშაობენ. მოგეხსენებათ, უნივერსიტეტში კონკურსები დაიწყო გია ხუბუას პერიოდიდან მოყოლებული. ვინ იყვნენ ის ადამიანები, ვინც იმ დროს კონკურსებში გავიდნენ? - მეტ-ნაკლებად ისინი, ვინც საბჭოთა პერიოდშიც გარკვეული პრივილეგიებით სარგებლობდნენ. სააკაშვილის დროს აქტუალური იყო, რომ ჩასარეცხი უნდა ჩაირეცხოს, მაგრამ კონკრეტულად ჩვენს ფაკულტეტზე, ეკონომიკისა და ბიზნესის ფაკულტეზტზე, ვინც ჩასარეცხი იყო, არ ჩარეცხილა. პირიქით, ძალიან ბევრი პატიოსანი ადამიანი აღმოჩნდა უნივერსიტეტის გარეთ.

ფაკულტეტზე ერთადერთი ადამიანი ვარ, რომელმაც სააკაშვილისდროინდელი რეჟიმის პერიოდი გაატარა სასამართლოში. იმ დროს სამი სასამრთლო პროცესი მქონდა, თუმცა დღესაც იგივე მდგომარეობაა. ანალოგიურ პრობლემებზე გვიწევს ბრძოლა.თუნდაც გამოვყოთ პროფესორთა არადემოკრატიულად შერჩევის წესი. ეს წესი სააკაშვილის პერიოდში დამკვიდრდა, რაც მიზნად ისახავდა ლექტორების დაშინებას და დაშანტაჟებას, ამით მანიპულირებდა უნივერსიტეტის ადმინისტრაცია. ლექტორთა უმრავლესობა საკუთარი მოსაზრებების გამოხატვას ერიდებოდა და დღესაც ანალოგიური მდგომარეობაა.

როგორ შევაფასო ის ფაქტი, რომ ამჟამინდალი დეკანი იბარებს კოლეგას და ტუქსავს იმის გამო, რომ ჩემს ფეისბუქ სტატუსზე კომენტარი გააკეთა?! დღესაც, თავზე რომ დაენგრეთ უნივერსიტეტი, ხმის ამომღები არავინაა. ამის მიზეზია ის, რომ წინ აქვთ კონკურსები და ადამიანს, რომელიც ხმას ამოიღებს, სააკაშვილის პერიოდის მსგავსად, დღესაც არ გაახარებენ.

მაშინდელი შერჩევის კრიტერიუმი არანაირ კანონზომიერებას არ ექვემდებარებოდა, არადა, პრეტენდენტმა წინასწარ ხომ უნდა იცოდეს, რისთვის მოემზადოს, რა არის ის კრიტერიუმი, რომლითაც მას აირჩევენ ან ასოცირებულ პროფესორად ან ასისტენტად. ამ კრიტერიუმებს წინასწარ არავინ გეტყოდათ. ვითომ ე.წ. კომისია შეიქმნებოდა და შანსი არ იყო, კომისიის რომელიმე წევრს გადაწყვეტილება მიეღო. უბრალოდ, არსებობდა პირდაპირი სიები და იმ სიებით გაჰყავდათ ხალხი. ამაზე მეტყველებს ის წაგებული პროცესები, რომელიც ხშირ შემთხვევაში გარიგებით სრულდებოდა და ემატებოდა შტატები.

დღესაც იგივე ადამიანები ატარებენ ამ კონკურსებს?

- დიახ, იგივე ადამიანებს აბარიათ ეს საქმე. წლების მანძილზე ვერ მოხერხდა პროფესორთა გამჭვირვალე კრიტერიუმების შემუშავება, რომელიც საშუალებას მისცემს პატიოსან მეცნიერს, შეინარჩუნოს სამსახური და გააგრძელოს სამეცნიერო საქმიანობა, ანუ იყოს ისეთი კრიტერიუმები, რომ მეცნიერი დაჯდეს და ამ კრიტერიუმების მიხედვითიმუშაოს წლების მანძილზე.

რაღაც იმედი გაჩნდა მაშინ, როცა უნივერსიტეტის პრორექტორად ახლანდელი ჩვენი განათლების მინისტრი - მიხეილ ჩხენკელი დაინიშნა. მოსვლისას მან შემოიტანა ახალი კრიტერიუმები. რასაკვირველია, ეს კრიტერიუმებიც დახვეწას საჭიროებდა და ამაზე თავადაც თანახმა იქნებოდა, მაგრამ მთელი ფაკულტეტი წავიდა მის მიერშემოტანილი ახალი კრიტერიუმების წინააღმდეგ. ეს იმით აიხსნებოდა, რომ ცალკეულმა პირებმა მანამდე არსებული გაურკვეველი კრიტერიუმებით მარტივად ჩაიგდეს ხელში აკადემიური თანამდებობები და ახალი კრიტერიუმების გამო ბევრი მათგანი კონკურსის მიღმა აღმოჩნდებოდა. სამაგიეროდ, წამოვიდოდნენ შედარებით ახალგაზრდა მეცნიერები, ბევრი მათგანი დააკმაყოფილებდა ახალ კრიტერიუმებს. ამიტომაც უნივერსიტეტმა ეს კრიტერიუმები ჩააგდო.

თუმცა მაოგნებს ერთი რამ. მე მქონდა შეხვედრა ბატონ მიხეილ ჩხენკელთან. მას ვუთხარი, ერთადერთი ადამიანი ვარ, რომელიც ამ კრიტერიუმებთან მიმართებით ფაკულტეტის წინააღმდეგ წავედი და მხარი დაგიჭირეთ, მაინტერესებს, მე რომ ახლა ვიბრძვი, ჩემს მხარეს ვინ არის-მეთქი? მე ვარ თქვენს მხარესო, - მითხრა მაშინ მიხეილ ჩხენკელმა. მაინტერესებს, სად არისიგი დღეს?

კონფორმისტების კასტა, რომელზეც თქვენ საუბრობთ და რომელიც უნივერსიტეტს წლების განმავლობაში მართავს, ადაპტირებულია უნივერსიტეტთან, ამიტომაც არიან „შეუცვლელები“. ამდენად, თქვენი მოლოდინი, რომ ეს კასტა ჩამოსცილდებოდა მართვის სადავეებს, გადაჭარბებული ხომ არ იყო?

- მათთან ბრძოლა ძალიან ძნელია. თუმცა ასეთ პირობებში ცხოვრება და არსებობაც შეუძლებელია. ამ დღეების განმავლობაში შეხვედრები მქონდა, მხარდაჭერას მიცხადებენ ცალკეული ადამიანები, რომლებიც დღეს ღიად ვერ გამოდიან, მათ შორის, არიან თანამდებობის პირებიც და ჩემი კოლეგებიც. ისინი ხმამაღლა ვერ აპროტესტებენ იმას, რაც უნივერსიტეტში ხდება, მაგრამ, თუკი დაინახავენ, რომ ვინმე გაიგონებს ჩემს ხმას, სხვაგვარად მოიქცევიან. ფაქტობრივად, პირველი ვარ, ვინც ღიად გამოვედი. ამდენი ხნის მანძილზე ვფიქრობდი, არ მიმეყენებინა ჩრდილი ახალი ხელისუფლებისთვის და მეტ-ნაკლებად თავს ვიკავებდი, მაგრამ ახლა უკვე წარმოუდგენელია მეტის ატანა. გეტყვით, რატომ არის უიმედო მდგომარეობა უნივერსიტეტში. ახლახანს ჩვენს ფაკულტეტზე ჩატარდა დეკანის არჩევნები. ეს არჩევნები ძალიან დაძაბული იყო. გარკვეულ მიზეზთა გამო არსებული დეკანი მიუღებელი იყო რექტორისთვისაც და ვიცოდით, რომ მისი დეკანად გაყვანა აღარ მოხდებოდა. სამაგიეროდ, წამოაყენეს კანდიდატურა, რომელიც, ფაქტობრივად, არავის უნდოდა. მას მხარს უჭერდა ერთადერთი ადამიანი, მომავალ დეკანს სწორედ იმ ერთი ადამიანის იმედი ჰქონდა. ეს იყო ავთანდილ სილაგაძე.

ახლანდელი დეკანი გიორგი ღაღანიძე რატომ იყო უნივერსიტეტელებისთვის მიუღებელი? ისიც მონაწილეობდა სააკაშვილისდროინდელ თამაშებში?

- მაინც უნივერსიტეტია და, ბუნებრივია, იმით აპელირება, რატომ უნდა ავირჩიოთ მიშა სააკაშვილის ბებიის ნათლული, ნათელ-მირონი და „ნაციონალი“, უნივერსიტეტისთვის შეუფერებელია. კარგი ლექტორია, თუმცა ეს არ ნიშნავს იმას, რომ ამავდროულად შეგიძლია იყო კარგი ხელმღვანელიც. ისევე როგორც, იყო კარგი მეცნიერი არ ნიშნავს იმას, რომ იქნები წარმატებული რექტორი და ა.შ. თუმცა ჩვენი ფაკულტეტისთვის კარგად იყო ცნობილი ამ დეკანისთვის დამახასიათებელი თვისებები, რაც მან გამოავლინა დეკანის მოადგილედ ყოფნის პერიოდში სწორედ ნაცრეჟიმის დროს. კერძოდ, როგორი შემსრულებელი, ეს პიროვნება ყველაფერზე წამსვლელი იყო, ეს კარგად იცოდა ფაკულტეტმა და, რასაკვირველია, ასეთი დეკანი არ უნდოდათ. თუმცა სრული პასუხისმგებლობით ვაცხადებ, რომ დაიწყო იმ ადამიანების დაშანტაჟება, ვინც დეკანს ირჩევს. ერთადერთი, მე ვიყავი, ვისაც შეეძლო ხმამაღლა გარკვეული ფაქტები დაელაგებინა და მეტ-ნაკლებად შეეშალა ხელი ამ პროცესისთვის, მაგრამ შევხვდი რექტორს.

მიუხედვად იმისა, რომ პირდაპირ რექტორს არაფერი უთქვამს და დემოკრატიულად და დავარცხნილად ლაპარაკობდა, ვინც გინდათ, ის აირჩიეთო, მისი საუბრიდან გამოვიტანე საწინააღმდეგო დასკვნა. ასევე, საუბარი მქონდა რექტორის მრჩეველთან, კახა ჭეიშვილთან და იქიდანაც გამოვიტანე დასკვნა, რომ რექტორატისთვის ეს კანდიდატურა მისაღები იყო. რაც მთავარია, მათ არეულობის სურვილი არ ჰქონდათ. წინა არეულობა პაპავას რექტორობის დროს, ფაქტობრივად, მე დამბრალდა მაშინ, როცა სრულიად სხვა ძალები მართავდნენ იმ პროცესს. ახლაც ვიფიქრე, ხომ არ შეიძლება, ყველგან ერთი ადამიანის სახელი ტრიალებდეს და თავი შევიკავე.

ასევე, შევხვდი ავთანდილ სილაგაძეს. ლამის ცხარე ცრემლებით ვტიროდი, რაიმე არგუმენტი ეთქვა ახალი დეკანის კანდიდატურის სასარგებლოდ. ვეუბნებოდი, ბატონო ავთანდილ, ადამიანს, რომელსაც დაგიქციეს ოჯახი, „ნაცებმა“ მოგიკლეს ოჯახის წევრი, რა საერთო გამონახეთ მათთან, რომ ასეთ ადამიანს უჭერთ მხარს? მისი პასუხი წარმოუდგენელი და შოკის მომგვრელი აღმოჩნდა. მან თქვა, რომ გააკეთებინებს ამ დეკანს ყველაფერს, რაც სურს. ჯერ ერთი, ესეც მიუღებელია - რაში მჭირდება მე ისეთი დეკანი, რომელსაც გავაკეთებინებ ყველაფერს, რაც მინდა. მას შემდეგ, რაც ბევრი ფაქტი დაიდო ბატონ გიორგი ღაღანიძის საწინააღმდეგოდ, შეშინდნენ და ნეიტრალურ პიროვნებაზე ფიქრი დაიწყეს. ინიციატივა რექტორის გუნდისგან წამოვიდა და ერთ-ერთი ასეთი კანდიდატი აღმოჩნდა ელგუჯა მექვაბიშვილი. ელგუჯა მექვაბიშვილს ჩვენთანაც ჰქონდა შეხვედრა და რექტორთანაც. ფაქტობრივად, მეგონა, ბატონი ელგუჯა შეიტანდა საბუთებს დეკანის არჩევნებზე, მაგრამ ძალიან სანდო წყაროდან გაჟონა ინფორმაციამ, რასაც საჭიროების შემთხვევაში, აუცილებლად დავადასტურებ. ამის შესახებ ფაკულტეტის საბჭოზეც ვისაუბრე, სადაც თქვეს, თითქოს ეს ბოდვაა. იგივე შემიძლია სასამართლოშიც დავადასტურო, რომ ეს ბოდვა არ არის. ამაზე უამრავი ადამიანი საუბრობდა და ის ადამიანები შეუძლიათ დაკითხონ. კერძოდ, გავრცელდა ინფორმაცია, რომ ელგუჯა მექვაბიშვილი დაიბარეს...

რექტორატში დაიბარეს?

- იცით რა, ეს ძალიან ბუნდოვანია, მე უკვე რექტორატსა და ავთო სილაგაძეს ერთად მოვიაზრებ. ამიტომ კონკრეტულად ვერ ვიტყვი, ვისთან დაიბარეს. ფაქტია, რომ მას უთხრეს, რაში სჭირდებოდა დეკანობა, ის ხომ 15 წელიწადი, მთელი საბჭოთა პერიოდი, დეკანი იყო? რატომღაც მან მატერიალურ მხარეზე გააკეთა აქცენტი და არა იმაზე, რომ უნივერსიტეტი და კონკრეტულად ჩვენი ფაკულტეტი ჭაობში ეფლობოდა და ამ ჭაობისგან გადარჩენა იყო საჭირო. მას დაპირდნენ, რომ დანიშნავდნენ ჟურნალის რედაქტორად, სადაც დამატებითი ანაზღაურება ექნებოდა პროფესორის ანაზღაურებასთან ერთად. სხვათა შორის, ბევრი თანამშრომელი ჩემთან საუბარში ამბობდა, რომ ეს ჭორია და ვერ დაიჯერებთდა, რომ ბატონ ელგუჯასთან ასეთი გარიგება შედგებოდა, მაგრამ აირჩიეს თუ არა დეკანი, მეორე დღესვე დანიშნეს ეს ადამიანი ჟურნალის რედაქტორად. ეს უკვე ნათელს ხდიდა, რომ ეს ბინძური გარიგება მართლაც არსებოდა და ის ჭაობი, რასაც უკვე ჩემი სტუდენტობიდან მოყოლებული, ვუყურებდი, ისევ გრძელდებოდა. რა თქმა უნდა, ეს ამბავი ფაკულტეტის საბჭოზე ხმამაღლა გავაპროტესტე, მაგრამ ერთი ადამიანი არ აღმოჩნდა, რომელიც ხმას ამოიღებდა და ძველ რედაქტორს დაიცავდა.

საიდან იცით, რომ თქვენს კოლეგებს თქვენი მსგავსი განწყობა ჰქონდათ?

- ისინი ამოდიოდნენ ჩემთან. ჩემი ოთახი, ლაბორატორია მაქვს მე-12 სართულზე, იქ ცალ-ცალკე ამოდიოდნენ პროფესორები და ბოდიშს მიხდიდნენ, რომ ხმამაღლა ვერ თქვეს სათქმელი, თანადგომას მიცხადებდნენ, მაგრამ რას ნიშნავს ეს ბოდიში, აღარ ვიცი. მდგომარეობა უფრო გამწვავდა. ამ ხელისუფლების ერთ-ერთი წარმომადგენლისგან, რომელიც ჩვენი პროფესორია (ჯერჯერობით მას ვერ დავასახელებ), ჩემთვის ცნობილი გახდა, რომ ახალმა დეკანმა შეიმუშავა ახალი კრიტერიუმები. მე გავეცანი ამ კრიტერიუმებს. როგორც კი წაიკითხავთ, მიხვდებით, რომ ეს ავთო სილაგაძესთან ერთად არის გაკეთებული. კრიტერიმები შოკისმომგვრელია, დარღვევითაა გაკეთებული და პირდაპირ მორგებულია კონკრეტულ პიროვნებებს. დეტალებში არ შევალ, ეს მომაბეზრებელი იქნება მკითხველისთვის.

ერთ-ერთი, რაც ყველაზე მთავარია, არის ის, რომ წლების მანძილზე, საბჭოთა პერიოდიდან დღემდე, ისეთ თანამდებობებზე, როგორიცაა კათედრის გამგე, პროგრამის ხელმძღვანელი, ექსპერტოი და სხვა, არჩევანს აკეთებდნენ ერთსა და იმავე ადამიანებზე. ანუ, სხვა ადამიანს შესაძლებლობა არ ჰქონდა, იმავე საქმიანობაში ჩართულიყო. ადგნენ და ისეთი აქტივობები, რომელიც თავისუფალ არჩევანზე არ არის დამოკიდებული და მხოლოდ პრივილეგირებულთა ექსკლუზიური უფლება იყო და არის, სწორედ ეს აქტივობები დაიწერეს ქულებად, რაც იმას ნიშნავს, რომ ადამიანები, ვისაც მე 1986 წლიდან ვუყურებდი, სიკვდილამდე უნდა დარჩნენ იმ ადგილებზე.

სწორედ ეს გავაპროტესტე, აბსოლუტურად ყველასთან მქონდა მიმოწერა, 5 ათასი მეგობარი მყავს ფეისბუკში და იმდენად შოკირებული ვიყავი, რომ მანიფესტივით დავწერე და ყველას გავუგზავნე, რათა მთელ საქართველოს გაეგო, რომ ისევ ჭაობში ვრჩებით. ჩემი გზავნილი რექტორმაც მიიღო. რექტორს პასუხების გაცემა წერილებზე არ ახასიათებს, მაგრამ, როგორც ჩანს, მასაც მოხვდა ეს წერილი გულზე და საკმაოდ ვრცელი პასუხი მომწერა, რომ ყველაფერი დემოკრატიულად ჩატარდება.

მინდა ვუპასუხო მას: ბატონო გიორგი, რა ჩატარდება დემოკრატიულად, როცა ეს კრიტერიუმები თქვენ არ შეგიმუშავებიათ?! ის, რასაც თქვენი მეგობარი მინისტრი დაგვპირდა, ჰაერშია გამოკიდებული და ვერ გაიტანეთ ეს კრიტერიუმები. „ნაცმოძრაობის“ დროს დატოვებული კრიტერიუმებით აპირებთ ხალხის გაყვანას?

მით უმეტეს, რომ არ არსებობს დემოკრატიული ფონი და არ იყო ჩართულობა ამ კრიტერიმების შემუშავებისას. შერჩევის კრიტერიუმები ბუნდოვანია. არჩევნები არ არის დამოკიდებული პროფესორთა თავისუფალ ნებაზე. ისინი დაშანტაჟებულნი არიან და ვერ ბედავენ აზრის დაფიქსირებას. კრიტერიუმების სამი ვარიანტია. ერთ ვარიანტზე უკვე მოგახსენეთ, როცა ვიწრო კომისია დგებოდა და ეს კლანი წინასწარ დაწერილ გადაწყვეტილებებს იღებდა. გარე და შიდა ადმინისტრაციული თანამდებობებით მიღებული პრივილეგიები აპრიორი მათი პრივილეგია იყო, რაც თანაბარ პირობებში ვერ ჩააყენებს სხვა კონკურენტებს. სწორედ ეს კრიტერიუმები აქვთ შეტანილი.

ასე რომ, ორგანიზაციაში კლიმატი ძალიან მძიმეა, აკადემიური პერსონალი ერთმანეთთან არის დაპირისპირებული, არიან დაშანტაჟებულნი კონკურსის გამო, ერთმანეთთან დალაპარაკების ეშინიათ, არ ენდობიან ერთმანეთს. მოვლენები „გათიშე და იბატონეს“ პრინციპით მიმდინარეობს.

როდესაც ეს ფაქტები ფაკულტეტის საბჭოზე გამოვააშკარავე, გიჟად შემრაცხეს, თითქოს ვიგონებდი. რაც მთავარია, იმდენჯერ აღმოვჩნდი ისეთ სიტუაციაში, როცა პროფესორი ამბობს ერთს და შემდეგ თავის ნათქვამს გადათქვამს, იძულებული გავხდი, ყველას საუბარი ჩამეწერა. ე.წ. წითელმა ინტელიგენციამ, რომლებიც ჩემივე ლექტორები იყვნენ საბჭოთა პერიოდში, ყველაფერი იკადრა. განსაკუთრებით აქტიურობდნენ ავთანდილ სილაგაძე და ელგუჯა მექვაბიშვილი. ერთმა მათგანმა გამოაცხადა, რომ, ვინც მოისმენდა ამ ჩანაწერს, ისიც უნდა დასჯილიყო, ხოლო მეორემ მოითხოვა, რომ ვიდრე პრობლემა არ გადაწყდებოდა, მე უნდა ამკრძალვოდა სოციალურ ქსელში რაიმეს დაწერა. 37 წელს ადამიანებს ხვრეტდენ, ახლა ვერ მოგკლავენ, მაგრამ სიკვდილამდე მიგიყვანენ.

ამ ადამიანებს არ სურთ პრივილეგიების დაკარგვა. ფინანსების გარდა, კიდევ რაში ვლინდება ეს პრივილეგიები?

- მე ვესაუბრე ავთანდილ სილაგაძეს. ვუთხარი, რომელ სამართლიანობაზე მელაპარაკებით და როგორ უნდა დავუჯერო თქვენს ნათქვამს, რომ ფაკულტეტზე სამართლიანად წარიმართება პროცესები, როცა ფაკულტეტზე დაბრუნდით, თქვენი კათედრა გაიკეთეთ. კი ბატონო, ღმერთმა შეგარგოთ, დიდი მეცნიერი ხართ, აკადემიკოსი, პროფესორი და გეკუთვნით ის კათედრა, მაგრამ, ყოველგვარი დამსახურების გარეშე თქვენს ცოლსა და მის მეგობარს ასისტენტ-პროფესორობიდან როცა გაუკეთეთ ასოცირებული პროფესორის ადგილი, ამიხსენით, რა დამსახურებისთვის მოიქეცით ასე? ეს ხომ არ არის თქვენი ბაღჩა-ბაღი, როგორც გინდათ, ისე რომ მოიქცეთ?! ამ დროს ფაკულტეტზე ძალიან ბევრი ასისტენტ-პროფესორია, რომლის კვალიფიკაციაც, სამართლიანად რომ ჩატარდეს კონკურსები, სრულ პროფესურაზე უკეთესია. ეს ადამიანები ვერასოდეს წავლენ წინ. ალბათ, ამისთვის სჭირდებათ გარკვეულ ადამიანებს მორჩილი დეკანატი, მორჩილი უმრავლესობა.

როგორ ფიქრობთ ამ პროცესის შეჩერებას? არსებობენ ძალები, რომლებიც დაგეხმარებიან?

- ეს პროცესი უნდა შეჩერდეს. თურმე, როცა ჩვენმა მინისტრმა - მიხეილ ჩხენკელმა დაურეკა მოსწავლეების დედას იტალიაში, ემიგრაციაში და თურმე ამ ქალბატონს ტელეფონზე ელოდებოდა, სანამ ის მოხუცს აჭმევდა. ადამიანო, წერილი მოგწერეთ, შეხვედრა ვითხოვე, სოციალურ ქსელში გვერდის ადმინისტრატორი შემპირდა, მინისტრს აუცილებლად გადავცემო. იტალიაში მოსწავლის დედას თუ ელოდებოდით, მე მზად ვარ, ნებისმიერ დროს გაგახსენოთ ჩვენი საუბარი, რომ იქნებოდით დედა-უნივერსიტეტის მხარეს. თავად ამბობდით, უმძიმეს გარემოში ვიმყოფებით ფაკულტეტზე, რომ ეს არის ჭაობიო. მან კარგად იცის, რა მდგომარეობაცაა და ამისთვის მარტო ვიბრძვი. იმასაც ხომ კარგად ხედავს, რომ დღესდღეობით წარმოდგენილი კრიტერიუმები სხვა არაფერია, თუ არა ისევ იმ კლანის გადარჩენა. ძალიან მწვავე, მძიმე ინფორმაციები გვაქვს, მქონდა გარკვეულ პირებთან შეხვედრები. ჩვენ არ გავჩერდებით და გავამწვავებთ სიტუაციას. აქ აღარც ნაცზეა საუბარი, აღარც ქოცზე, არანაირ პარტიულ კუთვნილებაზე საუბარი არ არის. აქ არის იმაზე საუბარი, რომ 1986 წლიდან მოყოლებული, როდესაც მე ფეხი შევდგი უნივერსიტეტში, რა კლანიც და მართვის რა ფორმებიც დამხვდა, ზუსტად იმავე მეთოდებით აგრძელებენ დღესაც მართვას. ამის ატანა წარმოუდგენელია.

ალბათ, ამიტომაც გარბიან უცხოეთში ლექტორები...

- რაკი უცხოეთი ვახსენეთ, მინდა გითხრათ, რომ უცხოეთში დეკანის, კათედრის გამგის თანამდებობები მონაცვლეობითია და ყველა პროფესორი ენაცვლება ერთმანეთს, რადგან არავის სურს ეს თანამდებობები. სად სცალია უცხოელ მეცნიერს იმისთვის, რომ ფაკულტეტს უხელმძღვანელოს?! მეტიც - არ არსებობს ქვეყანა, სადაც პროფესორს კონკურსს ასეთი წესით უტარებენ. ასისტენტ-პროფესორობიდან რომ გადადიხარ ასოცირებულ პროფესორად, იქ ყველაფერი დამთავრებულია. ეს კონკურსები წინა ხელისუფლებას ჭირდებოდა იმისთვის, რომ დაშანტაჟებული ჰყოლოდა ხალხი. დღევანდელ პირობებშიც იგივე ჭირდებათ. მე არ ვიცი, რა ხდება სხვა სფეროში, ჩემს სფეროში კი, განათლებას მართავენ ისევ ნაცები. იმდენად გამწარებული ვარ ახლა, რომ ყველასთან ვაპირებ შეხვედრას, რადგან უნივერსიტეტდან დღეს მხოლოდ სახელიღაა დარჩენილი.

ვისაც უნივერსიტეტის სახელი არ აღიზიანებს და რაღაც სასიკეთოს გაკეთება უნდა უნივერსიტეტისთვის, ყველასთან ვაპირებ შეხვედრას. კიდევ ერთხელ განვმარტავ კრიტერიუმების შესახებ, რომლებიც, სავარაუდოდ, ავთანდილ სილაგაძესთან ერთად შეიმუშავა დეკანმა. დეკანთან აღშფოთებული შევედი და მივხვდი, რომ მასთან საუბარი შეუძლებელი იყო. მან მითხრა, ეს კრიტერიუმები 14-მა პროფესორმა მიიღო და რას მიპროტესტებო. რვა პროფესორს დავურეკე, ყველა მათგანმა აღნიშნა, რომ მონაწილეობა არ მიუღიათ ამ კრიტერიუმების შემუშავებაში. მათ შორის, დავით ნარმანიამ, ნოდარ ხადურმა და სხვებმა. როგორც ჩანს, მათ გარეშე მიიღეს ეს კრიტერიუმები და მათ შედგენაში მონაწილეობა ძალიან ვიწრო კლანმა მიიღო.

ფაკულტეტზე არ ხდება ცოდნის გაზიარება. მინისტრმა რომ კრიტერიუმები წარადგინა, იმ კრიტერიუმებში ძალიან დიდი ადგილი ეთმობოდა ე.წ. ციტირების ინდექსსა და H ინდექსს. ეს ორი რამ მიუღწეველ ფანტაზიად მიაჩნდათ ადამიანებს. ამ დროს, იმ ადამიანებს, რომლებიც ძალიან ბევრს მუშაობდნენ და საკმაოდ მაღალი ხარისხის სტატიები ჰქონდათ დაწერილი, არც ციტირების ინდექსი ჰქონდათ და არც H ინდექსი. ეს ინფორმაცია ხელმისაწვდომი იყო სწორედ იმ კასტისთვის, რომელიც საბჭოთა პერიოდიდან მართავდა უნივერსიტეტს. ისინი ამ ინფორმაციას არ ავრცელებდნენ და საკუთარ კოლეგებს ამის შესახებ არ ეუბნებოდნენ, მაგრამ რაღაცნაირად მაინც გაჟონა ინფორმაციამ და დღეს ახალგაზრდებმა, რომლებმაც უკვე დაიწყეს ციტირების ინდექსზე მუშაობა, დააგროვეს ციტირების და H ინდექსებიც.

სამაგიეროდ, იმ ადამიანებს, რომელთა გაყვანასაც ესენი ფიქრობენ, ეს ინდექსები არ აქვთ და, შესაბამისად, ყველაზე ნაკლები ქულა უფიქსირდებათ ახლადშექმნილი შეფასებითი კრიტერიუმის მიხედვით. სად ხდება ეს და რომელ უნივერსიტეტში გინახავთ, რომ კოლეგები ერთმანეთს ინფორმაციას უმალავდნენ და ერთმანეთის გუნდურ მუშაობაზე არ ფიქრობდნენ?! იმ ვარიანტით, რომელიც თავის დროზე წამოაყენა მინისტრმა, ფაკულტეტზე მოხდებოდა სრული ცვლა. ახალგაზრდა თაობა ჩაანაცვლებდა ძველ თაობას. აქ ახალგაზრდას პირობითად ვამბობ, უფრო შემცვლელი თაობა იგულისხმება, თორემ რომელ ახალგაზრდაზეა საუბარი? 1986 წელს, მე რომ მოვედი უნივერსიტეტში სტუდენტად, ჩვენ უნდა ვითვლებოდეთ ახალგაზრდებად? ეს ხომ სასაცილოა.

ამ ბერკეტების ხელიდან გაშვება არ აწყობს ე.წ. წითელ ინტელიგენციას. ეს მინისტრის ინეტერსშიც უნდა შედიოდეს. მერე რა, რომ ის დღეს მინისტრია, ის იყო თავის დროზე უნივერსიტეტის კანცლერი და წმინდა ადმიანურად, მას ხომ ახსოვს, რაზეც მელაპარაკა. მინდა, მან ეს გაიხსენოს.

აღარ გავაგრძელებ ბევრ რამეზე დღეს საუბარს, მაგრამ ძალიან ბევრი რამ მაქვს სათქმელი. ფაქტია, ისევ ნაცკრიმინალური ბანდა მართავს სისტემას.

kote25

2018-10-05 18:22:25

vitali12-ს:

ასე იცავთ იმის კონკურსანტის ინტერესებს, რომელმაც 14-დან 1 ხმაც კი ვერ მიიღო?

nini7

2018-10-05 21:03:36

universiteti2018

ქალბატონი ნინო, ერთ-ერთი გამორჩეული ლექტორია. მის მიერ წაკითხული ლექცია ყოველთვის გამოირჩევა პროფესიონალიზმით, საინტერესოა და ცდილობს სტუდენტს რაც შეიძლება მეტი ცოდნა გადასცეს.აქვს თბილი ურთიერთობა სტუდენტებთან და არ მიმაჩნია სწორ საქციელად მისი მისამართით თქვენს მიერ გამოთქმული შეფასებები, მით უმეტეს მაშინ, როცა სხვა ლექტორებისგან მისი მისამართით კარგის მეტი არაფერი გვსმენია.

1234

2018-10-05 22:07:33

ადრსაქართველოს უნივერსიტეტებმა დოქტორანტების მიღება უნდა შეაჩერონ გარდა ქართული ენების/ლინგვისტიკის და ისტორიის ფაკულტეტებსა. საქართველოს აღარ აქვს არც შესაბამისი სამეცნიერო მატერიალური ბაზა და არც პროფესურა რომ მეცნიერების დოქტორები მოამზადოს. ამ დოქტორებსაც უნგრევს ცხოვრებს და უმუშევრობისთის წირავს, და მათ სტუნდენტებსაც და მათ მშობლებსაც რომელნიც მათგან განათლების მიღებაში ფულს იხდიან და შემდეგ უცხოურ, მაღალ რეიტინგულ უნივესიტეტ დამთავრებულ ახალგაზრდებს კონკურენციას ვერ უწევენ ქართულ სამუშაო ბაზარზე. წარმატებული სტუდენტები უნდა გაიგზავნონ უცხოეთის საუკეთესო უნივერსიტეტების დოქტორანტურებში სახელმწიფო დაფინანსებით და დაბრუნების და უნივერსიტეტში მუშაობის 10-15 წლიანი პირობით. გადმოიღონ თურქეთის და იორდანიის მაგალითები.
ეს ქალბატონი სწორეა იმაში რომ ქვეყანამ 20-30 წელი ამუშავა, შემდეგ დაითხოვა, და ცხოვრება გაუნადგურა. თუ არ იყო ღირსი ასოცირებული პროფესორის წოდების მაშინ თავის დროზე არ უნდა მიეცათ და დრო ექნებოდა სხვა კარიერა გაეკეთებინა. უნდა უჩივლოს სახელმწიფოს და განათლების სამინისტროს, თუნდაც იმ "საკონსტიტუციო სასამართლოში" მისი უფლებების დარღვევაზე. ეს უსაქმური მოსამართლეები მარიხუანის მოხმარების ლეგალიზაციას ახდენენ მაშინ როცა სახელმწიფოს მიერ ადამიენების უფლებების დარღვევის ამისთანა მაგალითებზე უნდა რეაგირებდნენ. ის რომ შარშანწინ ედო იყო, და შარშან სააკა და დღეს ივანაა სახელმწიფოს სათავეში გასამართლებლად არ გამოდგება. სახელმწიფო ერთია და თავისი მოქალაქეების უფლებები უნდა დაიცვას მიუხედავად იმისა რომელი მმართველოს დროს შევიდა ეს ქალბატონ სახელმწიფო სამსახურში. უნივერსიტეტის სახელმწიფოსია და ეს ქალბატონიც სახელმწიფო მოხელე იყო. საქართველოში უნდა შემოვიდეს მუდმივი "ტენიურებული" პროფესორის მექანიზმი რომელიც ამ ქალბატონის მსგავსი პროფესორების და მასწავლებლების უფლებების დაცვას შეუწყობს ხელს და ასე ხელისმოსმით ვერ გააგდებენ. ამერიკას და დასავლეთს რომ ბაძავენ, ამაშიც მიბაძონ. ეს ყველაფერი ძლიერი პროფკავშირების არ არსებობს ბრალია.
უნივერსიტეტს კი ავტონომია უნდა შეეზღუდოს. მას ხალხი აფინანსებს და შესაბამისად პასუხისმგებელი უნდა იყოს ხალხის წინაშე. რექტორს პარლამენტის მიერ დამტკიცებული მზრუნველთა საბჭო უნდა ირჩევდეს, და დეკანებს კი უნივესიტეტის ადმინისტრაცია და მზრუნველთა საბჭო პროფესურის და სტუდენტების ჩართUლობით.

bondo8102

2018-10-05 22:28:20

ქალბატონო ნინო,თქვენი ფანტაზია არის განუსაზღვრელი.რატომ არ წერთ იმის შესახებ, რომ წლების განმავლობაში პროვოკაციებს უწყობდით და ტერორში ამყოფებდით კათედრას. თქვენ არა მარტო საკონკურსო კომისიის, არამედ კათედრის არცერთმა წევრმა მხარი არ დაგიჭირათ.კოლეგების ლანძღვა-გინებას გირჩევნიათ დაელოდოთ სასამართლოს გადაწყვეტილებას.

ზაქრო12

2018-10-05 22:45:01

ქალბატონო ნინი, მაპატიეთ, მაგრამ თქვენი წერილი მეოცე საუკუნის ოცდაათიანი წლების ერთგვარი გამოძახილია. მაშინაც სიბილწითა და უმეცრებით შეიარაღებული წითელი პროფესურა, უნივერსიტეტში დევნიდა დიდ ივანე ჯავახიშვილს, შალვა ნუცუბიძეს კი საერთოდ აუკრძალეს ლექციების კითხვა. ავთანდილ სილაგაძე აკადემიკოსია და ამ მაღალი წოდების ეჭვქვეშ დაყენება ჩრდილს აყენებს მთლიანად საქართველოს მეცნიერებათა აკადემიას, სადაც ის ერთხმად აირჩიეს, ამისი უფლება კი არც თქვენ და არც სხვას არ აქვს. ცნობილია ისიც, რომ ის წინა ხელისუფლების დროს განიცდიდა რეპრესიებს, რის გამოც იძულებით დაატოვებინეს უნივერსიტეტი, როგორც ჩანს თქვენ ის ამ პერიოდში სიამოვნებით ჩაანაცვლეთ, რითაც ამაყოფთ კიდევაც. იმ პერიოდში ხმას არ იღებდით იმ ტოტალურ უსამართლობაზე, რაც უნივერსიტეტში ხდებოდა, დღეს კი საკონკურსო, სააპელაციო კომისიებისა და აკადემიური საბჭოს მიერ დაწუნებული, უღირსი გზებით ებრძვით თქვენს კოლეგებს. განა ვერ ხვდებით, რომ ამით შეურაცყოფთ დედა უნივერსიტეტს, რომელსაც თითქოსდა ეთაყვანებით. სამარცხვინო ყოველივე ეს ...მტრის წისქვილზე ასხამთ წყალს ....დროა დაფიქრდეთ !

Gela51

2018-10-05 23:05:13

ქ-ნი ნინო პაპაჩაშვილი, რომელმაც კონკურსში მიიღო შეფასება ნული, მიზეზებს საკუთარ თავშიც უნდა ეძებდეს და მიზეზის ახსნას მხოლოდ სხვებზე გადაბრალებით არ უნდა ცდილობდეს-მითუმეტეს სიცრუის ტირაჟირებით; უარგუმენტოდ არ უნდა ლანძღავდეს კონკურსში გამარჯვებულ კოლეგებს, რომლებმაც მაქსიმალური შეფასებები მიიღეს და რომლებიც, როგორც მინიმუმ, მასზე ნაკლები სპეციალისტები არ არიან. საკონკურსო კომისიისადმი მისი პრეტენზიები არ გაიზიარა არც სააპელაციო კომისიამ და არც თსუ აკადემიურმა საბჭომ. უფლებამოსილი იყო და გაასაჩივრა კიდეც სასამართლოში, რაც ნორმალურია და ალბათ უნდა დაელოდოს სასამართლო განხილვის შედეგებს. კარგი ლექტორობა მისი მხრიდან კოლეგებთან არაკოლეგიალურ ურთიერთობას, დაუსრულებელ პრეტენზიებს-ჩივილს, ლანძღვას არ გულისხმობს... და ეს ხდება არა მხოლოდ ბოლო 5-6 წლის განმავლობაში. ეს იმის გამო, რომ თავად უსაფუძვლოდ შეეხო სხვა საკითხებს, რითაც უსუსურად ცდილობს კონკურსში მისი წარუმატებლობის გადაფარვას...

koka3113

2018-10-05 23:37:01

პატივცემულო ნინო, კარგი ლექტორები თქვენნაირად ბუნდოვნად, ღვარძლით არ ლაპარაკობენ. აშკარად ჩანს, რომ თქვენ მართლაც ასეთი არაკოლეგიალური და ცილისმწამებელი მომჩივანი ბრძანდებით. ალბათ, თქვენს მიერ მიღბული 0 ხმა ამანაც განაპირობა.

universiteti2018

2018-10-05 23:38:12

nini7

ამ საკითხს არ შევხებივარ. ცნობილია სტუდენტთა გამოკითხვის მასალებიც. ჩემი მოსაზრებების შეფასებაში არ გეთანხმებით, თუმცა თქვენი ნებაა თუ ვის მოსაზრებას გაიზიარებთ.

qiziyi

2018-10-05 23:39:32

ავთანდილ სილაგაძევ! შენს ავანსცენებს ყავლი გაუვიდა, ანუ მეთოდები მოგიძველდა!სწორედ ეგ ნული ხმა იქნება, აბსოლუტურად რომ დაგანგრევს შენც და შენს მიერ დამონებულ ანკლავსაც. პაპავა ყოჩაღი რექტორი იყო და აბა მოუყევი საზოგადოებას, პერსონალური ვაკანსია და გარემონტებული კაბინეტი როგორ ჩაგახუტა დედა უნივერსიტეტში. ნეტავი გამაგებინა, ერს რაიმე ვალი გვაქვს სილაგაძის და არ ვიცი?! ისე მოვიძიებთ, საგმირო საქმეებს პრივატიზაცია-პრიხვატიზაციის მინისტრისგან ჩადენილს, რომელიც დაჯილდოვდა ღირსების ორდენით რამეთუ შესანიშნავად მოახდინა საქართველოს სახელმწიფოსი და მისი მოსახლეობის ქონების განიავება სრული ამ სიტყვის მნიშვნელობით.
ნამდვილად არ იმსახურებდა ნინო ასე მოქცევას. ის სამაგალითო პროფესიონალი, შრომისმოყვარე, საქმის უღალატო შემსრულებელი, ინოვატორი და უნივერსიტეტის განვითარებაზე ორიენტირებული ადამიანია. ის უბრალოდ არ აგყვათ და ამიტომაც მიიჩნიეთ დაბალ ღობედ. ძალიან შეცდით! ჭკუა რომ გყოფნოდათ, მის კვალიფიკაციას, აზროვნებას, ინოვაციებს ჯეროვნად დააფასებდით,მაგრამ სსრკ-ს დროინდელი იერარქიული მანტიის ხიბლი თან გდევთ და სხვაგვარ აზროვნება-ქცევაში ხელს გიშლით. ალბათ გსმენიათ სტრასბურგის ადამიანის უფლებათა სასამართლოზე?!
გგონიათ "უფაქტოდ" მოქმედებთ, მაგრამ კუდები, რაც თქვენ დაგრჩათ თქვენდა უნებურად, ერთი კი არა, ოთხი საქმის მოგებას ეყოფა!
სამართალი, პროგრესი, განვითარება, პატიოსნება, აუცილებლად იზეიმებს და თქვენ და იმ ნული ხმების ავტორებზე დრო ნამდვილად ვერ იმუშავებს.

gocha44

2018-10-06 00:21:41

qiziyi

ისევ არგუმენტების დეფიციტი, ლანძღვა, მუქარა. ერთი დასაბუთებული პრეტენზია მაინც დაასახელეთ საკონკურსო და სააპელაციო კომისიებისადმი თუ რატომ მიიღეთ შეფასება 0. ა.სილაგაძე არ იყო ამ კომისიების წევრი და თუ კომისიებში მისი ჩარევის რაიმე დამადასტურებელი დოკუმენტი გაგაჩნიათ გამოაქვეყნეთ და არა ისე, როგორ ამას თქვენ აკეთებთ. ჯერ სასამართლო არ ჩატარებულა და უკვე სტრასბურგით იმუქრებით!
ფრთხილად, ნუ უზრდელობთ! ასეთი ქმედების გაგრძელების შემთხვევაში ყველა ცილისმწამებელს პასუხი მოგეთხოვებათ დადგენილი წესების შესაბამისად.

gocha44

2018-10-06 00:27:47

qiziyi

ისევ არგუმენტების დეფიციტი, ლანძღვა, მუქარა. ერთი დასაბუთებული პრეტენზია მაინც დაასახელეთ საკონკურსო და სააპელაციო კომისიებისადმი თუ რატომ მიიღეთ შეფასება 0. ა.სილაგაძე არ იყო ამ კომისიების წევრი და თუ კომისიებში მისი ჩარევის რაიმე დამადასტურებელი დოკუმენტი გაგაჩნიათ გამოაქვეყნეთ და არა ისე, როგორ ამას თქვენ აკეთებთ. ჯერ სასამართლო არ ჩატარებულა და უკვე სტრასბურგით იმუქრებით!
ფრთხილად, ნუ უზრდელობთ! ასეთი ქმედების გაგრძელების შემთხვევაში ყველა ცილისმწამებელს პასუხი მოგეთხოვებათ დადგენილი წესების შესაბამისად.

petrekupry

2018-10-06 09:20:49

ავთო სილაგაძე და ვლადიმერ პაპავა არიან თანამედროვე ქართული ეკონომიკის მეტრები.... ეს სტატია სიძულვილითაა დაწერილი, ავთო სილაგაძეს რომ კაცი ეტყვის უნივერსიტეტში არ უნდა იყოო, ნათელია, რომ იგივე იდეოლოგიას აწვება, რომლითაც ჯავახიშვილი გააგდეს, ასევე ვეკუა გადახვეწეს საქართველოდან ....

javaxishvili1918

2018-10-06 09:55:03

ვრცელდება ინფორმაცია, რომ 'ღია' კონკურსების შემდგომ კიდევ უფრო დიდი 'რეფორმები' იგეგმება თურმე ეკონომიკისა და ბიზნესის ფაკულტეტეზე. კერძოდ კლანის შეფარულ წევრებს მუდმივი პროფესორობის სტატუსი შემოაქვთ, ყველაფერზე წამსვლელი დეკანი სანამ ჰყავთ გვერდით.

სხვათაშორის, ფაკულტეტის ბნელი ამქარნი ხსენებული სტატუსის საკუთარ თავზე მორგების გარდა, კომისიაში აქტიური მუშაობის და დაკვეთის პირნათლად შესრულების სანაცვლოდ ზოგიერთს საჩუქრად ამვე მუდმივი პროფესორის სტატუსის ბოძებას უპირებენ.

ვნახოთ განხორციელდება თუ არა თსუ-ს 'მავზოლეუმიზაცია' ?!

მე თ

IVANE2018

2018-10-06 10:44:42

ზაქრო12

თქვენი ირონია მოსაწონია, გამგები გაიგებს.
და კიდევ გეტყობათ ავთანდილ სილაგაძეს კარგად იცნობთ და ალბათ გსმენიათ, რომ მისი აკადემიკოსობის მიმართ, გინდათ თუ არ გინდათ, კითხვებია.
ამასთან, ეტყობა უნივერსიტეტის მიღმა დარჩენის გავლენაა, რომ ფარული გარიგებების დიდოსტატი, არც მეტი არც ნაკლები, მუდმივ პროფესორობას ითხოვს თავისთვის და ბატონ ვლადიმერ პაპავასთვის.
ვლადიმერ პაპავასთვის მუდმივი პროფესორობა კიდევ გასაგებია, იყო თსუ-ის რექტორი, ხელს უწყობს ახალგაზრდების განვითარებას და მხარდაჭერას, აქვს მრავალი ფასეული და საერთაშორისო მასშტაბით აღიარებული ნაშრომი, რომლითაც მრავალმა ქვეყანამ გაიცნო საქართველო და თსუ.
ვლადიმერ პაპავას სახელს ამოფარებულ და მისი მხარდაჭერით თსუ-ში დაბრუნებულ ავთანდილ სილაგაძესთვის, რომლის ღირებულ სამეცნიერო ნაშრომს საქართველოს საზოგადოება (მით უმეტეს საერთაშორისო) არ იცნობს და რომელიც სახელს იმკვიდრებს - როგორ უსწორდება მისთვის მიუღებელ პროფესიონალებს, როგორ აფერხებს პროგრესს, როგორც ქმნის შიშსა და უსამართლობას, მუდმივი პროფესორობა ???!!!!

kote25

2018-10-06 11:08:35

javaxishvili1918 ...
დემაგოგია ცოდნის "მავზოლეუმიზაციაშიცაა". ამ საკითხზე კარგა ხნის წინ მიღებულ კანონს მაინც გაცნობოდით, რომლითაც მთელი ქვეყნის მასშტაბით დადგინდა პროფესორის(უვადო) თანამდებობის შემოღება, მათ შორის თსუ-ში და მის ფაკულტეტებზე (კონკურსის წესით).

javaxishvili1918

2018-10-06 11:09:00

სამწუხაროდ ივანე ჯავახიშვილთან დღვანდელ თსუ-ს მხოლოდ დასახელება აკავშირებს, კიდევ კარგი ცხონებული ვერ ხედავს რას დაამსგავსეს ცალკეული, უღირსი ადამიანების ქმედებებმა განათლების, განვითარების და მეცნიერების მიზნით შექმნილი ეროვნული ფასეულობების მქონე უნივერისტეტი და ფასადური განვითარების ფონზე როგორ იჟღინთება იგი სიძულვილით, ნეპოტიზმით, მომხვეჭელობით, კლანურობით, ინტრიგებით, შანტაჟით, სიყალბით, ფასრისევლობით, ჩაგვრით, დაშინებით ... მაგრამ მერწმუნეთ ეს ყველაფერი ერთ დღეს იფეთქებს, დრო ყველას ჩამოხსნის მორგებულ ნიღაბს, თსუ აუცილებლად გათავისუფლდება მათგან და კვლავ დაიბრუნებს ძველ დიდებას ...







kote25

2018-10-06 11:20:06

IVANE2018

საქართველოს საზოგადოების სახელით დემაგოგები ვერ ისაუბრებენ.

javaxishvili1918

2018-10-06 11:29:17


უვადო პროფესორის თანამდებობის რა მოგახსენოთ, მაგრამ ზოგერთი უვადო პატიმრობას ნამდვილად იმსახურებს.

javaxishvili1918

2018-10-06 11:33:24

რაც არ უნდა დემაგოგია უწოდოთ, სახეზე შეხორცებული ნიღბების მიუხედავად დრო ყველას დარმქევს საკუთარ სხაელს. არაფერი არ იმალება ამ ქვეყანაზე.

Gela51

2018-10-06 11:55:40

"კოლექტიურ ნინო პაპაჩაშვილებს":

რატომ ვერ პასუხობთ კონკრეტულ შეკითხვებს?

რატომ მიიღო ქ-მა ნინომ 14-დან -0 ხმა?

რატომ ვერ ასახელებთ საკონკურსო კომისიაზე ზემოქმედების კონკრეტულ ფაქტებს?

ქ-ნი ნინო და მისი მხარდაჭერები თავად ხომ არ ზემოქმედებდნენ საკონკურსო კომისიის წევრებზე?

თუ კომისია მიუღებელი იყო,შედეგების გამოცხადებამდე ქ-ნი ნინო მას რატომ არ აკრიტიკებდა?

მისთვის სასურველი შედეგის მიღების შემთხვევაში მას კომისიის გაკრიტიკებ აღარ დასჭირდებოდა?

მხოლოდ ნულოვანი შედეგის მიღების შემდეგ გაახსენდა ქ-ნ ნინოს კომისიების და კოლეგების დაუმსახურებელი ლანძღვა-გინება?

არ გაინტერესებთ თუ რატომ აქვთ კათედრის წევრთა აბსოლუტურ უმრავლესობას თქვენგან განსხვავებული მოსაზრება?

კითხვებზე კონკრეტული პასუხის გარეშე, თქვენს ულოგიკო ლანძღვა-გინებას, ყურადღების მიპყრობის უსუსურ მცდელობას ფასი არა აქვს...

arichopra 2

2018-10-06 12:45:14

აი ახლა ამათ უყურე?! აი ასეთები არიან საერთოდ მეცნიერები და პედაგოგები?! ამიტომ საეროდ უნდა გაუქმდეს ყველა სახელმწიფო უნივერსიტეტის ავტონომია. სრულ სახელმწიფო დაქვემდებარებაში უნდა გადავიდეს ყველა სასწავლო დაწესებულება, რომელსაც აბრევიატურაში უწერია სიტყვა სახელმწიფო, როგორც იყო 1991 წლამდე ანუ სანამ უპასუხისმგებლო დილეტანტების ხელით კოლექტიურმა დასავლეთმა არ დააქცია ძვლივს აშენებული და მოღონიერებული საბჭოთა საქრთველო, და მასთან ერთად ჩამოყალიბებული, გამართული სასკოლო, პროფესიულ-ტექნიკური, საინსტიტუტო, საუნივერსიტეტო, აკადამიური სისტემა!

ana111

2018-10-06 18:07:22

No comment

https://scholar.google.com/citations?user=W9IoQjAAAAAJ&hl=ru&oi=sra

vs

https://scholar.google.com/citations?user=gVfKzv8AAAAJ&hl=ru&oi=ao

romani

2018-10-06 19:11:37


1234-ს

თსუ-ს არ ინახავს ხალხი, იგი არსებობს სწავლების საფასურის და სამეცნიერო გრანტების ხარჯზე. მიუხედავად მცდელობისა, რომ სახელმწიფომ საბაზო დაფინანსება გამოუყოს სახელმწიფო უნივერსიტეტებს, ასეთი რამ არ ხდება.
პრობლემების ლომისწილი, რომელიც თსუ-შია, გამოწვეულია მწირი ბიუჯეტით (დაახლოებით 30 მილიონი აშს დოლარი/წლ). იგივე პარამეტრების (მაგ. სტუდენტთა და პროფესურის კონტიგენტი) მქონე ვარშავის უნივერსიტეტის (აქ საუბარი არ არის წამყვან უნივერსიტეტებზე) ბიუჯეტი თითქმის 200 მილიონი ევროა.

ავტონომიურობა კი საუნივერსიტეტო განათლების ქვაკუთხედია ოდითგანვე. სხვაგვარად იგი ფიქციაა.

ზაქრო12

2018-10-06 23:27:48

ქალბატონო ნინი, რატომ ტოვებთ უპასუხოდ იმ შეკითხვებს, რომელის თქვენს წინაშე დაისვა ? როგორც ჩანს ან არ გაგაჩნიათ მათზე პასუხები, ან ეს შეკითხვები თქვენთვის ძალზედ მტკივნეულია, საზოგადოებას აინტერესებს ობიექტური ჭეშმარიტება და არა უნივერსიტეტისთვის შეუფერებელი ლაძღვა-გინების მოსმენა.

მურმანი

2018-10-07 22:36:23

ქალბატონი ნინო მართლაც არის კონფლიქტური პიროვნება; ბატონი ავთანდილ სილაგაძე ჯერ არ იყო დაბრუნებული უნივერსიტეტში რომ მას ჰქონდა განუწყვეტელი კონფლიქტები ფაკულტეტის თანამშრომლებთან. სასაცილოა მისი მტკიცება თითქოს ბატონმა ავთანდილმა ის მოიცილა იმის გამო რომ ის მას კონკურენციას ვერ გაუწევდა საერთაშორისო ეკონომიკაში; არადა სიმართლე უნდა ითქვას, რომ ქალბატონი ნინო არ არის საერთაშორისო ეკონომიკის სპეციალისტი. მართლაც, მან საკუთარ თავში უნდა ეძიოს მიზეზები (14 ხმიდან მიიღო 0 ხმა) და არა ავთანდილ სილაგაძეში.

რეგისტრაცი?/p>

დახურვ?/span>
სახელი:

პაროლი:

გაიმეორე?პაროლი:



სარეკლამო ბანერი
1000 X 80